મુંબઈની મુલાકાત – અનેક ખાટીમીઠી ઘટનાઓ…

મુંબઈની ગત મહીનાની (મે ૨૦૧૩) મુલાકાત અનેક રીતે ખાટી મીઠી રહી… કેટલીક મહત્વની ઘટનાઓ..

પરિવાર સાથે થાણે પાસે આવેલા સૂરજ વોટરપાર્કમાં ખૂબ ધમાલ કરવામાં આવી, ક્વચિતને અને હાર્દીને તો મજા પડી જ પડી, અમને બંનેને અને સાથે આવેલા મિત્ર કનુભાઈ તથા તેમના પરિવારને પણ ખૂબ જ મજા આવી. સૂરજ વોટરપાર્ક સુઆયોજીત, વ્યવસ્થિત, સુઘડ અને સુવિધાજનક પાર્ક છે જ્યાંની લગભગ બધી જ રાઈડ્સનો લાભ લેવામાં આવ્યો (ફક્ત એક વર્ટીકલ ફૉલ વાળી રાઈડ સિવાય). અહીં વેવપુલ, અવનવી સ્લાઈડ્સ વગેરેની સાથે સાથે અંતે ચોખ્ખા પાણીથી સમૂહસ્નાનની સગવડ આપતી ‘ગંગાવતરણ’ નામની વ્યવસ્થા ખૂબ સુંદર છે. અંદર મળતું ભોજન પણ સરસ હતું અને ભાવ પણ આવી જગ્યાએ વ્યાજબી કહી શકાય એવા જ હતા.

પ્રતિભા અને બાળકો સાથે શ્રી સિદ્ધિવિનાયક ગણપતિના મંદિરે દર્શન કરવામાં આવ્યા, ત્યાંથી ગેટવે ઑફ ઈન્ડીયા અને જુહૂ બીચ, ઈસ્કોન મંદિર વગેરે સ્થળોની મુલાકાત લેવામાં આવી…

ભાયંદર સ્ટેશને લોકલ ટ્રેનની ટિકિટ લેતી વખતે કોઈક ‘કલાકાર’ મારા શર્ટના ઉપલા ખિસ્સામાંથી નવેનવો ‘સેમસંગ ગેલેક્સી એસ. ૪’ ઉપાડી ગયો. ફક્ત પાંચેક સેકન્ડના ગાળામાં બની ગયેલી આ ઘટનાએ અનેક કાર્યક્રમો ખોરવી નાંખ્યા અને સાથે સાથે અનેક લોકોને મળવાનો બનાવેલો કાર્યક્રમ ખરાબ મૂડને લીધે રદ્દ કર્યો. ભાયંદર પોલીસ કહે, તમે રેલ્વે પોલીસને કમ્પ્લેઈન કરો, જેના માટે વસઈ જવું પડ્યું. ત્યાં ગયો તો રેલ્વે પોલીસ કહે ટીકીટબારી સિટી પોલીસની હદમાં છે એટલે ત્યાં ફરીયાદ લખાવો… ફુટબોલ મેચને અંતે રેલ્વે પોલીસે ફરીયાદ લીધી અને રીસીવ કરીને કૉપી આપી. જો કે મારા જેવા બીજા છ લોકો ત્યાં એક કલાકના ગાળામાં આવા જ મોંઘા ભાવના મોબાઈલ ગુમાવીને આવેલા, એ પાછા મળવાની આશા…. રાખવી જોઈએ ખરી ?

સ્ટાર પ્લસની રાત્રે દસ વાગ્યે પ્રસારીત થતી પ્રચલિત સીરીયલ ‘પ્યાર કા દર્દ હૈ…’ માં મિત્ર મેહુલભાઈ બૂચ મામાજીના પાત્રમાં છે. તેમનો સંપર્ક કર્યો તો તેમણે ગોરેગાંવ ફિલ્મસીટીમાં આવેલા રાજશ્રી પ્રોડક્શન્સના સેટ પર બોલાવ્યો. સતત બે દિવસ શૂટીંગની સાથે સાથે મળતા બ્રેકમાં અમે મન ભરીને વાતો કરી. અક્ષરનાદ માટે કેટલીક વિશેષ યોજનાઓ વિશે વિચાર કરવામાં આવ્યા, ડૉક્યુમેન્ટરી માટે પણ મદદ કરવાની તેમણે ખાત્રી આપી અને સાથે સાથે જૂનીયર મહેમુદ સાહેબ અને મુકેશ ખન્નાને પણ મળવાનો અવસર મળ્યો. એ જ સેટની સામે સરસ્વતીચંદ્રનું પણ શૂટિંગ ચાલી રહ્યું હતું, એ સેટ પણ જોવામાં આવ્યો, ચાર કરોડથી વધારે ખર્ચે બનેલ સંજય લીલા ભણસાળીનો એ ભવ્ય સેટ સાચે જ મનોહર છે, જો કે સીરીયલ જોઈએ એવી ચાલી નહીં એ અલગ વાત છે…

હવે ફરીથી મહુવા અને અંતે પીપાવાવ પહોંચી ગયો છું, સાત દિવસનો એ રઝળપાટ મોબાઈલ ખોવાઈ જવાને લીધે ઘણો ખટક્યો…